كيفية أرجاع موبايل تم سرقتة|طريقة يرجع بيها موبايل اتسرق

كيفية أرجاع موبايل تم سرقتة|طريقة يرجع بيها موبايل اتسرق ( مجربتش الطريقة بس ممكن تنفع حد بإذن الله ،

الموضوع بعيد شوية عن تخصص الجروب بس طريقة ممكن تنفع حد فقد الامل ان موبايله يرجع )

تمام اوي، سيبك من اي ابليكيشن ولا find my device ولا الهري ده كله، كل ده هيتمسح لان اللي خده هيعمله ضبط مصنع، علشان تجيب موبايلك ركز في الموضوع ده،

و ان شاء الله تليفونك هيرجع بنسبة 95% ..

اتسرق مني هونر 8 ورجعته في شهر و نص .. ودي خلاصة تجربتي، اولا متكلمش اي حد متعرفوش يرجعهولك علشان دول نصابين

و عاوزين اي سبوبة و خلاص و هياخد منك نسبة وممكن اصلاً بعد ما يرجع يقولك للاسف مفيش

و يكون خده هو، وكدة كدة مش هيعمل اكتر من اللي انت هتعمله، انا رجعت الموبايل بدون ما ادفع مليم وبدون اي واسطة

(مش هتفيد في شي لان الموضوع روتيني جدا طالما دخل النيابة خلاص هيمشي زيه زي غيره) ..

ثانياً متعملش محضر في القسم مباشرة .. أسرع سيارة 

الموضوع ببساطة هتتوجه لـ (مباحث التليفونات) اللي حضرتك تابع ليها و بتعرف ده بأنك تتصل بيهم

و هما هيدلوك و ممكن تكلم الشرطة او ١٤٠

هيدلك على انهي مباحث تليفونات تتوجهلها و مواعيدها ايه، انا في حالتي اتوجهت لمباحث شرق القاهرة

فوق سنترال الماظة طلعت الدور الرابع لقيت مكتب قاعد فيه واحد و كان فيه طابور صغير ٣ اشخاص قدامي ضايع منهم تليفوناتهم

موبايلك اتسرق و بتتصل بيه مغلق؟

(ابتديت احس بالامان لما لقيت اللي قدامي بيقول دي تاني مرة موبايلي يتسرق و اجيبه)

لما جه الدور عليا الراجل طلب مني الآتي

(بطاقتي، و صورة منها، و علبة التليفون الاصلية ومحتوياتها الاصلية اللي فاضلة معايا،

و صورة من العلبة من الناحية اللي فيها السيريال وارقام الشرائح اللي كانت في التليفون قبل ما يتسرق)

و هو اللي بيعملك المحضر بنفسه نيابة عن القسم وبتحتفظ برقم المحضر ده عندك (مهم جدا)،

(اتأكد كويس من الارقام رقم رقم وارقام شرائح التليفون اللي كانت فيه علشان يتأكدوا انك انت صاحبه فعلا)

المهم تتعامل مع الموظف ده باحترام

و توصيه باسلوب طيب و محدش طلب مني اي بقشيش او فلوس نهائي

رغم اني بصراحة عرضت عليه فلوس في ايده و رفض .. هاتف نوكيا

 

“طريقة يرجع بيها موبايل اتسرق “

 

بس كدة انت خلصت، اول ما الموبايل هيتفتح ويتحط فيه شريحة تانية هيوصلهم اشارة برقم الشريحة

اللي فيه و هما بنفسهم اللي هيكلمولك صاحبها علشان يخوفوه بالذوق

و يقولوله التليفون ده متبلغ عنه و مطلوب فورا يا اما فيها حبس و معاهم اسمه بالكامل و رقم بطاقته

في اغلب الاحوال بشكل ودي جداً الي واخد الموبايل

سواء هو السارق او حد غلبان اشتراه من الحرامي و ميعرفش في الحالتين بيجيبه فوراً مبيترددش

و ساعتها هتلاقي امين شرطة بيكلمك تروح تستلم بعد حوالي شهرين لـ ٣ مثلا انت و حظك،

اما لو حضرتك حابب تتابع بتتوجه لقسم الشرطة تاخد منهم الرقم السري لرقم المحضر و بيدلوك

تتابع مع انهي نيابة بتروح للنيابة دي تديهم الرقم يقولولك حالة الكشف ايه

(مثلا فودافون ردت رد سلبي اتصالات سلبي اورانج و وي لسة ، لحد ما حد فيهم يرد ايجابي)..

ساعتها هتلاقيهم لوحدهم بيكلموك ويضبطوا معاك معاد ومكان تروح تستلم موبايلك بتروح و بتقابل الشخص

اللي معاه التليفون في المكتب عند أمين الشرطة في النيابة و بتعامله بأدب و احترام

(اهم حاجة عندك تليفونك يرجع مش رايحين نتخانق ولا نشمت في حد جايز ميكونش

هو اللي سرقه و يكون مظلوم زيك اشتراه من واحد نصاب)

و لو مش عاجبك حالته حقك ترخم عاللي شايل التليفون وتطلب تعويض عن استهلاكه

كيفية أرجاع موبايل تم سرقتة|طريقة يرجع بيها موبايل اتسرق
كيفية أرجاع موبايل تم سرقتة|طريقة يرجع بيها موبايل اتسرق

 

موبايلك اتسرق و بتتصل بيه مغلق؟

 

(بس انا حمدت ربنا بصراحة واكتفيت بالتليفون زي ما هو) و بس بتمضي استلام و اغلاق محضر و بعد كدة الأمين

بياخدك انت و اللي كان معاه التليفون و يدخلكم لوكيل النيابة لتأكيد عملية الاستلام والوكيل ساعتها بيتأكد انك حقك رجعلك

و بيحذر اللي كان معاه التليفون يشتري موبايل بدون علبه او مجهول المصدر ..

الموبايل رجع الحمد لله وبدون مدفع ولا مليم ولا اي وسايط ..

متسيبش حقك ومتتعصبش ولا تستسلم و اعمل اللي عليك و ارضا بنصيبك في كل الاحوال و ان شاء الله خير..

نصيحة مهمة بقي، لما يرجع الموبايل ان شاء الله ما تنساش تعمله ضبط مصنع وانت واقف

و تفتح جوجل أكاونت بحسابك لان لما عملتله ضبط طلع عيني علشان كان متسجل بحساب اللي كان شايله قبلي،

و أهم نصيحة انك متكسلش و متستسلمش و اي حد تعرفه موبايله ضايع تشجعه يرجعه

لأن لو كل واحد فينا نفذ الاجراءات دي و رجع تليفونه هنقضي على فكرة سرقة التليفون نهائي

واي حد هيفكر يسرق تليفون هيكون عارف انها ملهاش لازمة و هيسيبه مكانه ..

 

أرقام مباحث التليفونات العامة: 

25771755 / 25798166

رقم مباحث تليفونات شرق القاهرة: 22904224

عنوان مباحث تليفونات شرق القاهرة: في مبنى سنترال الماظة الدور الرابع، قدام كوبري النزهة

مقالات ذات صلة

زر الذهاب إلى الأعلى
error: Content is protected !!